Sonurinn fékk nafnið Isaiah Ellason Fox

María Birta greindi frá tíðindunum á Instagram.

„Fox fjölskyldan er svo heppin að bæta við sig öðrum rebbaling. Systur hans eru afar skotnar í honum og kyssa hann og knúsa í klessu alla daga! Ignacia kallar hann ZayZay, Naja kallar hann BigBoy aka Big Boy Sandwich, pabbi kallar hann Biggie og mamma kallar hann Gússi Músadúskason,“ skrifar María við mynd af fimm manna fjölskyldunni.

„Við kynnum með stolti, son okkar, Isaiah Ellason Fox,“ skrifar hún jafnframt.

María og Elli hafa búið í Las Vegas um árabil þar sem hún starfar sem leikkona og hann myndlistarmaður. Hjónin urðu bandarískir ríkisborgarar fyrir þremur árum og tóku upp árið 2024 eftirnafnið Fox.

Auk þess að hafa ættleitt þrjú börn þá eru þau hjón einnig stoltir fósturforeldrar og hafa tekið að sér börn sem vantar heimili. Fyrr í mánuðinum opnaði Elli listasýningu með eldri dóttur sinni, hinni fjögurra ára gömlu Ignaciu, í gallerí Herma á Hverfisgötu.