Krakkarnir bjuggu til sögulegt sumar fyrir íslenskan körfubolta

Óskar Ófeigur Jónsson skrifar 16. ágúst 2026 22:01

Berglind Katla Hlynsdóttir stóð sig frábærlega á tveimur Evrópumótum i sumar, hjálpaði fyrst tuttuga ára liðinu að halda sér í A-deildinni og svo sextán ára liðinu að komast í úrslitaleik um sæti í A-deild sem tapaðist naumlega. Berglind var valin besti leikmaðurinn í sextán ára mótinu. FIBA Basketball

Sumarið 2027 verður sögulegt fyrir íslenskan körfubolta þökk sé frábærum árangri yngri landsliða Íslands í Evrópukeppnunum í sumar.

Ísland mun nefnilega eiga þrjú landslið í A-deild Evrópukeppnanna næsta sumar en hefur mest áður átt tvö A-deildarlandslið í einu ári.

Landsliðin sem verða í A-deild næsta sumar eru bæði tuttugu ára landslið Íslands og svo sextán ára landslið karla sem var síðasta liðið til að tryggja sig upp í A-deild.

Sextán ára stelpurnar voru líka aðeins einum sigri frá því að komast líka upp í A-deildina næsta sumar en þær töpuðu naumlega á móti gestgjöfum Grikkja í hreinum úrslitaleik um sæti í A-deildinni.

Valsarinn Atli Freyr Haraldsson Katrínarson var með 18 stig, 13 fráköst í úrslitaleik sextán ára landsliðsins á móti Króötum og var síðan valinn í úrvalslið mótsins. FIBA Basketball

Íslenska tuttugu ára landslið kvenna var eina íslenska landsliðið sem tók þátt í A-deild í sumar og stelpurnar gerðu það frábærlega með því að ná þar tólfta sæti og halda sér í hópi A-þjóða. Þrettán efstu þjóðirnar héldu sæti sínu.

Í aðalhlutverki í þessu tuttugu ára liði voru stelpur bæði úr sextán ára og átján ára landsliðinu sem áttu eftir að keppa á öðru Evrópumóti í sumar. Það þýðir að þær fá aftur tækifæri til að keppa í A-deildinni með tuttugu ára landsliðinu á næsta ári sem boðar gott.

Íslenska tuttugu ára landslið karla vann sér sæti í A-deildinni með því að ná öðru sæti í B-deildinni en liðið fór alla leið í úrslitaleikinn þar sem liðið tapaði á móti Úkraínumönnum. Úkraína og Svíþjóð fóru upp ásamt íslensku strákunum.

Strákarnir í íslenska tuttugu ára landsliðinu tryggðu Íslandi sæti í A-deildinni þegar Evrópumótið verður spilað á næsta ári.FIBA Basketball

Sextán ára strákarnir tryggðu sér sæti í A-deildinni eftir risasigur á Bosníumönnum í undanúrslitaleik en urðu að sætta sig við annað sætið eftir naumt tap á móti gríðarlega sterku króatísku landsliði sem á auðvitað ekkert að koma nálægt B-deildinni ef allt væri eðlilegt.

Þetta allt saman þýðir að sumarið 2027 verður sögulegt sumar fyrir íslenskan körfubolta eins og sjá má á þessari samantekt á yngri landsliðum Íslands í hópi A-deildarþjóða.