Þúsundir manna mót­mæla í 50 borgum

Fréttastofa Breska ríkisútvarpsins greinir frá. Mótmælendur kalla eftir betri löggjöf fyrir leigjendur en tillögur ríkisstjórnarinnar gegn húsnæðiskreppunni voru felldar á spænska þinginu í gær. 

„Það er mikil reiði á götum úti,“ sagði talsmaður leigjenda í Valencia-borg. Á sumum stöðum hafa mótmælendur átt í útistöðum við lögreglumenn. Ríkisstjórnin lagði fram frumvarp í því skyni að leysa húsnæðisvandann á Spáni. 

Padro Sánchez, forsætisráðherra Spánar, mælti fyrir frumvarpinu í gær en það átti að bregðast við ákalli þjóðarinnar í kjölfar þess að 87 ára gömul kona var borin út af heimili sínu í síðasta mánuði. Leiga hennar hækkaði skyndilega og konan átti ekki efni á að standast skil á þeirri hækkun sem var talsverð. Hún hafði átt heima í íbúðinni áratugum saman.

Mótmæli brutust út þar sem fjölmargir Spánverjar kölluðu eftir banni við útburði til 2030 og þaki á leiguverði.  Sérfræðingar telja að sú staðreynd að frumvarpið hafi ekki komist í gegnum þingið gæti kallað á þingkosningar fyrr en áætlað var.

Dagblaðið El País segir að samkvæmt heimildum sé Sánchez nú að íhuga að boða til kosninga.

Stærstu mótmælin fara fram í Madríd. Þar hafa mótmælendur tjaldað á Puerta del Sol-torgi í nokkra daga til að vekja athygli á stöðunni. Félag leigjenda á Spáni hefur kallað eftir verkfalli hjá verkafólki til að mótmæla stöðunni.