Jón Dagur og fé­lagar enn með fullt hús

Liðin mættust á Ólympíuvellinum í Berlín í dag og gat Hertha viðhaldið fullkominni byrjun liðsins á leiktíðinni.

Omar Sillah virtist koma Greuter Furth yfir á 60. mínútu leiksins en eftir endurskoðun myndbandsdómara var markið dæmt af. Aðeins fimm mínútum síðar lagði Josip Brekalo upp mark fyrir bakvörðinn Mads Pedersen sem veitti Herthu Berlín forystuna.

Miðjumaðurinn Paul Seguin skoraði svo annað mark Herthu tíu mínútum fyrir leikslok, aftur eftir stoðsendingu Króatans Brekalo.

Jóni Degi Þorsteinssyni var skipt af velli á 87. mínútu og skömmu síðar skoraði Jannis Heuer fyrir Greuter en það dugði skammt.

Herta vann 2-1 sigur og er áfram með fullt hús stiga, 21 stig eftir sjö leiki, á toppi deildarinnar, fjórum stigum á undan Nurnberg sem er í öðru sæti.