Ísak skoraði glæsi­mark í sigri

Köln fékk Gladbach í heimsókn í fimmtu umferð þýsku deildarinnar í dag. Ísak Bergmann var að venju í byrjunarliði heimamanna og hann braut ísinn er hann kom Köln yfir á 26. mínútu leiksins.

Köln tók þá aukaspyrnu utan af kanti sem var skölluð frá. Ísak fékk boltann skoppandi við D-bogann og setti boltann á lofti upp í skeytin fjær.

Kaninn Joseph Scully jafnaði fyrir Gladbach á 39. mínútu og staðan var 1-1 í hálfleik.

Framherjinn ungi Said El Mala skoraði svo það sem reyndist sigurmarkið fyrir Köln á 67. mínútu og liðið vann 2-1 heimasigur.

Köln var að vinna annan leik sinn á tímabilinu og er með sjö stig í tíunda sæti deildarinnar. Gladbach er stigalaust á botni deildarinnar.