Glæsilegur kvartmílubíll

Tryllitæki þessarar viku er Subaru Impreza STi árgerð 2003. Bíllinn er eins konar fjölskylduhobbí hjá Guðlaugi Má Halldórssyni og foreldrum hans. Foreldrar hans eiga bílinn en Guðlaugur keppir í kvartmílu á honum. Áður átti fjölskyldan Subaru Imprezu árgerð 1999 og voru byrjuð að fikta aðeins í honum. Þau keyptu síðan þennan nýja frá Ingvari Helgasyni hér á Íslandi á síðasta ári og komu sér strax í samband við Roger Clark, breskt fyrirtæki sem sér um að breyta bílum. Bretarnir höfðu reyndar ekki pláss fyrir bílinn þá en tóku hann að sér þar sem bíll af þessari tegund var ekki til í Bretlandi. Þeir sjá ekki eftir því þar sem bílnum og Guðlaugi hefur gengið mjög vel í kvartmílunni. Guðlaugur hefur keppt mikið hér heima og er nýkominn frá Bretlandi þar sem hann keppti á mjög stóru móti. Þar gekk honum mjög vel og lenti í sjöunda sæti af alls 130 keppendum. Bíllinn er með tveggja lítra vél og skilar 532 hestöflum. Hann er búinn að vera í yfirhalningu hjá Roger Clark og búið er að breyta honum talsvert. Bíllinn er enn með standard gírkassa og drif en búið er að skipta um driföxla og gera allt í vélinni miklu sterkara. Vélin er því sambærileg og í rallíbílum sem keppa í heimsmeistarakeppninni. Roger Clark hefur líka stutt vel við bakið á Guðlaugi og fjölskyldu og kom með þeim á stóra mótið í Bretlandi á dögunum. Að sögn Guðlaugs er bíllinn mjög skemmtilegur og honum finnst afskaplega gaman að keppa í kvartmílu þó að sportið sé ansi dýrt.