Grikkir reiðir vegna lyfjamálsins

Grikkir fjölmenntu á úrslit 200 metra hlaupsins á Ólympíuleikunum þó svo að þeirra maður, Kostas Kenteris, væri fjarri góðu gamni vegna lyfjamisferlis. Grikkir hrópuðu nafn hans ótt og títt enda höfðu þeir upphaflega borgað fyrir aðgang til að sjá Kenteris verja Ólympíutitil sinn. Shawn Crawford, sigurvegari 200 metra hlaupsins, sagðist skilja reiði Grikkja. "Við erum stödd þar sem Ólympíuleikarnir urðu til, núverandi Ólympíumeistari er grískur en það voru vissar kringumstæður sem urðu til þess að hann gat ekki tekið þátt" sagði Crawford. "Grikkir eru skiljanlega mjög vonsviknir og reiðir".