Hægindastólar eftirsóttir

Hægindastóllinn á heimilinu er gjarnan það húsgagn sem mest er karpað yfir, allir vilja flatmaga í fína stólnum og láta líða úr sér eftir daginn. Margir tala um að verða "háðir hægindastólnum" því oft eru þetta miklir lúxusstólar, hannaðir til að hvíla líkamann, mjúkir og ávalir. Hægindastóll var hér áður fyrr oft kallaður húsbóndastóll enda var þetta frátekið sæti fyrir húsbóndann þegar hann kom þreyttur heim úr vinnu. En tímarnir breytast og mennirnir með og nú er hægindastóllinn vonandi ætlaður öllum fjölskyldumeðlimum, ungum sem öldnum.