271 öruggur og líklegur kjörmaður

George W. Bush Bandaríkjaforseti hefur tryggt sér 193 kjörmenn samkvæmt samantekt AP-fréttastofunnar og leiðir í ríkjum þar sem barist er um 78 kjörmenn. Samkvæmt þessu er hann með 271 öruggan og líklegan kjörmann og því á leið með að fá einum kjörmanni fleira en þarf til að tryggja sér sigur. John Kerry hefur tryggt sér 188 kjörmenn í þrettán ríkjum samkvæmt samantekt AP og leiðir í fimm ríkjum sem skila af sér 43 kjörmönnum. Samkvæmt þessu er hann með 231 líklegan og öruggan kjörmann. Enn hefur ekkert verið kveðið upp úr um hvor leiði í þremur ríkjum með 36 kjörmenn.