Til sálfræðings vegna tapsins

Stuðningsmenn Johns Kerry í bandarísku forsetakosningunum hafa margir hverjir leitað til sálfræðinga eftir hjálp við að jafna sig á áfallinu eftir ósigur hans fyrir George W. Bush Bandaríkjaforseta. Áfallasérfræðingurinn Douglas Schooler sagði dagblaðinu Boca Raton News að hann hefði fengið fimmtán stuðningsmenn Kerrys í meðferð eftir kosningarnar. "Einn sagði mér að hann hefði aldrei verið svona þunglyndur og reiður á ævi sinni," sagði hann og bætti við að fólk hefði talað um að flytja úr landi.