Valda ekki flóðbylgjum hér

Jarðhræringar valda ekki flóðbylgjum hér við land nema við mjög sérstakar aðstæður að sögn jarðeðlisfræðings. Mestu öldur myndast í mjög djúpum lægðum en hæst hefur hafalda mælst 25,2 metrar við Íslandsstrendur. Ölduhæð við Ísland er með því mesta sem þekkist að sögn Gísla Viggóssonar, forstöðumanns á Siglingastofnun Íslands. Strendur landsins eru því víða vel varðar miklum öldugangi ólíkt þeim svæðum þar sem 10 metra há flóðbylgja gekk á land í kjölfar jarðskjálftans í Asíu á sunnudag. Hæsta alda sem mælst hefur við strendur landsins var 25,2 metrar en þessi ölduhæð mældist við Vestmannaeyjar og Garðskaga þann 9. janúar árið 1990. Ölduhæðin olli gríðarlegum sjávarflóðum við Eyrarbakka og Stokkseyri og náði allt frá Vík í Mýrdal í austri að Snæfellsnesi í vestri að sögn Gísla. "Þessar stóru haföldur myndast þegar mjög djúpar lægðir eru mjög lengi að grafa um sig yfir Atlantshafinu," segir Gísli. "Veðurhæð þarf að vera mikil og það verður að blása mjög lengi." Einnig þarf stórstreymi að fara saman við mesta öldugang af völdum lægðarinnar að sögn Gísla. Jarðhræringar valda hins vegar ekki flóðbylgju hér við land nema við mjög sérstakar aðstæður að sögn Páls Einarssonar jarðeðlisfræðings. "Jarðskjálftar sem valda flóðbylgjum eru oftast tengdir lóðréttum hreyfingum í jarðskorpunni, það þarf að sparka svolítið undir hafsbotninn til þess að flóðbylgja myndist," segir Páll. "Flestir jarðskjálftar við landið tengjast láréttum hreyfingum í jarðskorpunni en ef hafsbotninn hreyfist bara lárétt verður vatnið ekkert vart við það og engin flóðbylgja verður til. " Páll segir flóðbylgjur á borð við þá sem gekk á land í Asíu á sunnudag mjög sjaldgæfar í Atlantshafi. "Þær finnast fyrst og fremst í Kyrrahafinu en koma örsjaldan fram í Indlandshafi eins og gerðist á sunnudaginn," segir Páll. Flóðbylgjur geta einnig myndast við það að eldfjöll hrynja í sjó fram. Slíkir atburðir eru afskaplega fátíðir að sögn Páls en gerast þó.