Hagnaður Microsoft tvöfaldast

Hagnaður Microsoft tvöfaldaðist á síðasta ársfjórðungi vegna aukinnar eftirspurnar og kostnaðaraðhalds samkvæmt greiningardeild Íslandsbanka. Hagnaðurinn nam 3,46 milljörðum dollara eða rúmum 215 milljörðum íslenskra króna. Sala og hagnaður fyrirtækisins, sem er stærsti framleiðandi hugbúnaðar í heiminum, var umfram spár greiningaraðila og verð hlutabréfa í félaginu hækkaði í kjölfarið. Sala fyrirtækisins á tölvuleiknum Halo 2 fyrir Xbox leikjatölvuna gekk vonum framar og skilaði góðum hagnaði. Þá hefur gengislækkun dollara ekki komið fyrirtækinu illa heldur hagnaðist það um 250 milljónir dollara á fjórðungnum vegna veikingar dollars. Nú er reiknað með meiri tekjum en áður á fjárhagsárinu, sem endar í júní, og spáð að þær verði um 40 milljarðar dollara.