Aukatónleikar með Kyrkjebö

Miðar á tónleika, sem norska söngkonana Sissel Kyrkjebö hyggst halda hér á landi 30. september næstkomandi í Háskólabíói, seldust upp á innan við klukkustund í sérstakri forsölu í morgun. Af þessum sökum hefur verið ákveðið að efna til aukatónleika og fara þeir fram kvöldið eftir, 1. október. Miðasala á aukatónleikana hefst á morgun, miðvikudag, í verslunum Skífunnar, verslunum BT úti á landi, í síma 511 2255 og á www.concert.is. Miðaverð er frá 4.900 til 8.000 króna.