Uppfærsla hjá Mercedes-Benz

Framleiðandi Mercedes-Benz bifreiða hefur ákveðið að auka gæði ákveðinna gerða bifreiða sem eru í umferð um allan heim með því að innkalla þær og uppfæra til jafns við gæðakröfur sem gerðar eru í nýjustu gerðum Mercedes-Benz bifreiða. "Við erum að framleiða bifreiðar í hæsta gæðaflokki sem þekkst hefur hjá fyrirtækinu. Markmið okkar er uppfæra þær bifreiðar sem athugasemdir hafa borist vegna, svo þær standist ströngustu gæðakröfur okkar," segir Dr. Eckhard Cordes, yfirmaður Mercedes-Benz. Í bensínknúnum bifreiðum, sem eru með sex strokka og átta strokka bensínvélar og framleiddar voru á tímabilinu júní 2001 til nóvember 2004, er spennustillir á rafala athugaður og endurnýjaður ef þörf krefur. Í gerðunum í E-Class og CLS-Class, sem framleiddar voru frá janúar 2002 til janúar 2005, er komið fyrir nýjum hugbúnaði í stjórnboxi til að mæta aukinni raforkuþörf í bílnum. Einnig er hemlakerfi endurbætt í bílum af gerðinni E-Class, Sl-Class og CLS-Class sem framleiddar voru á tímabilinu júní 2001 til mars 2005. Eigendur þessara tegunda Mercedes-Benz bifreiða á Íslandi fá sent bréf af þessu tilefni. Þeim er einnig velkomið að hringja í Bílaumboðið Öskju, sölu og þjónustuumboð Mercedes-Benz á Íslandi, í síma 5902100 hafi þeir einhverjar spurningar.