Dæmdir fyrir að starfa án leyfa

Þrír Lettar voru í dag í Héraðsdómi Suðurlands dæmdir í eins mánaðar fangelsi sem er skilorðsbundið til tveggja ára fyrir starfa hér á landi án tilskilinna atvinnuleyfa. Þetta kemur fram í tilkynningu frá Sýslumanninum á Selfossi. Mennirnir voru teknir til yfirheyrslu í gær og í dag gaf lögreglustjórinn á Selfossi út ákæru á hendur þeim. Mennirnir mættu fyrir dóm í dag og játuðu þar brot sín. Þeir lýstu því fyrir dómi að þeir hygðust ekki áfrýja dóminum. Lögreglan vinnur áfram að rannsókn þess þáttar málsins er snýr að þætti annarra, Íslendinga og eftir atvikum útlendinga sem komið hafa við sögu. Fram kom að laun mannanna reyndust mjög lág á íslenskan mælikvarða. Þeir höfðu dvalist hér á landi frá 18. febrúar síðastliðinum og unnið byggingarvinnu við hlið Íslendinga.