Prófkjör Samfylkingar í Hafnarfirði

Næstkomandi laugardag fer fram lokað prófkjör hjá Samfylkingunni í Hafnarfirði. Nú þegar eru tvö þúsund manns á kjörskrá og leyfilegt er að skrá sig í flokkinn fram að kjörfundi. Kjörfundur hefst klukkan tíu og stendur til sex og kjörgengir eru þeir sem orðnir eru sextán ára á kjördag.

Samfylkingin hefur nú hreinan meirihluta í bæjarstjórn, með sex fulltrúa af ellefu. Tuttugu og tveir eru í framboði og ljóst er að aðalbaráttan verður um efstu átta sætin. Núverandi bæjarstjóri Lúðvík Geirsson býður sig fram í fyrsta sæti og bæjarfulltrúinn Ellý Erlingsdóttir í annað sæti. Þau eru talin nokkuð örugg um sín sæti og því verður baráttan aðallega um þriðja sæti og síðan sætin þar fyrir neðan. Athygli vekur að einn bæjarfulltrúa Gunnar Svavarsson býður sig í baráttusætið, það sjötta.