Ég mun aldrei segja upp

Graeme Souness, stjóri Newcastle, segir að hann muni aldrei segja upp stöðu sinni hjá félaginu þótt móti blási, en hann hefur verið gagnrýndur nokkuð eftir tap fyrir Wigan í bikarnum á dögunum, þar sem Wigan stillti nánast upp varaliði sínu.

Þegar Souness var spurður hvort það hvarflaði einhverntíman að honum að segja starfi sínu lausu hjá Newcastle, brást hann reiður við. "Það gerist aldrei og það er tímasóun að spyrja mig svona spurninga. Ég vil geta horft framan í mig í speglinum þegar ég raka mig eftir að ferlinum líkur og því kemur aldrei til greina fyrir mig að gefast upp á nokkrum hlut. Ég geri mér grein fyrir því að ég hef verið gagnrýndur mikið undanfarið. Við spiluðum illa gegn Wigan og við eigum eftir að spila illa einhverntíman aftur, það fylgir þessu," sagði Souness.