Sannfærði Gerrard um að fara ekki

Rafael Benitez, stjóri Liverpool rifjaði það upp í viðtali við BBC um helgina að hann hafi átt sinn þátt í að sannfæra fyrirliða liðsins, Steven Gerrard, um að fara ekki frá félaginu og ganga í raðir Chelsea í sumar. Eins og flestir muna eftir, munaði aðeins hársbreidd að Gerrard færi frá Liverpool.

"Við töluðum saman um hvað hann vildi gera í framtíðinni og hvað Liverpool þýddi fyrir hann. Ég spurði hann hvað hann vildi gera í framtíðinni og hann sagðist vilja vinna titla með Liverpool. Ég sagði honum því að við þyrftum að fara vel ofan í saumana á málinu og upp úr því kaus hann að vera áfram hjá félaginu," sagði Benitez.

"Ég vissi alltaf hvað ég hafði hérna og hvað yrði erfitt að fara frá því. Þessvegna gat ég ekki farið frá Liverpool þegar til kastanna kom. Stundum veit maður ekki alveg hvað maður hefur fyrr en maður hefur komist í aðstöðu eins og ég í sumar og það var í raun fjölskylda mín sem gerði mér það endanlega ljóst hvað ég hef það gott hérna," sagði Gerrard sjálfur.