Hugleiddi að snúa aftur heim

Hjálmar Þórarinsson, U21 landsliðsmaður Íslands, hefur fengið fá tækifæri með skoska úrvalsdeildarliðinu Hearts á þessu tímabili. Hjálmar er tvítugur og var hann í síðustu viku orðaður við 1. deildarliðið Hamilton í Skotlandi og var talað um það að félagið vildi fá hann að láni út þetta tímabil.

Ég veit eiginlega lítið um þetta mál, þetta kom vel til greina á tímabili og ég held að þetta sé enn inn í myndinni. Það á bara eftir að koma í ljós hvað gerist í þeim málum. Félagaskiptaglugginn lokar núna í lok ágúst og því ætti þetta að fara að koma í ljós, sagði Hjálmar Þórarinsson við Fréttablaðið í gær en hann er samningsbundinn Hearts út þetta tímabil og einnig það næsta.

Mér líður mjög vel hérna úti og er ekkert mikið að stressa mig þótt maður vilji náttúrulega fá sín mál á hreint, sagði Hjálmar sem viðurkennir að honum finnist hann ekki hafa fengið nægilega mörg tækifæri. Tækifærin ættu samt að koma ef maður heldur áfram að leggja sig fram og þá verður maður að ná að grípa tækifærið þegar það kemur.

Hjálmar er sóknarmaður og hefur hann farið út til reynslu hjá liðum í Skandinavíu að undanförnu, norska 1. deildarliðinu Álasundi og sænska úrvalsdeildarfélaginu AIK Solna. Ég hef mikinn áhuga á því að fara í lið á Norðurlöndunum ef rétta tækifærið gefst, sagði Hjálmar sem er uppalinn hjá Þrótti og keypti Hearts hann frá félaginu í marsmánuði í fyrra. Hann viðurkennir að hafa íhugað að snúa aftur heim þar sem honum hefur gengið illa að vinna sér inn sæti í liði Hearts. Ég hugleiddi það á tímabili en eins og staðan er núna held ég að ég verði hérna áfram í einhvern tíma.