Í dag var dregið í riðla fyrir undankeppni Evrópumeistaramóts landsliða í körfuknattleik, en leikirnir fara fram í haus og næsta haust. Karlaliðið er í riðli með Finnlandi, Austurríki, Georgíu og Lúxemburg, en kvennaliðið fékk Noreg, Holland og Írland.
Sigurður Ingimundarson, þjálfari karlaliðsins segir í viðtali á vef körfuknattleikssambandsins að hann sé nokkuð sáttur við mótherja liðsins, en bendir á að óháð mótherjunum eigi íslenska liðið að eiga góða möguleika á að komast í A-flokk, en liðið er sem kunnugt er á meðal B-þjóða í styrkleikaflokkum FIBA.
