Við erum ekki betri en Arsenal

Rafa Benitez, stjóri Liverpool, segir að sitt lið sé enn ekki betra en Arsenal þó það sé ofar í töflunni það sem af er vetri. Benitez segist bera mikla virðingu fyrir Arsene Wenger og því starfi sem hann hafi unnið hjá Arsenal.

"Ég er ekki maður sem segir að við séum með betra lið en Arsenal þó við séum með aðeins fleiri stig en þeir í dag. Við erum nálægt því að ná liðum eins og Arsenal og Manchester United að styrk, en erum ekki búnir að ná þeim stað ennþá. Við verðum að halda áfram á sömu braut og þá kannski tekst okkur að komast upp að hlið þessara liða eða jafnvel framúr þeim. Arsene Wenger er frábær knattspyrnustjóri og ég ber mikla virðingu fyrir því starfi sem hann hefur unnið með lið Arsenal, því lið hans spilar skemmtilega knattspyrnu," sagði Benitez, en liðin eigast við á Anfield klukkan 20 í kvöld.