Chicago - Philadelphia í beinni

Í kvöld verður síðasta beina útsendingin úr deildarkeppninni í NBA áður en kemur að fjögurra daga hlé vegna Stjörnuhelgarinnar í Houston. Leikur kvöldsins er viðureign Chicago Bulls og Philadelphia 76ers, en útsending hefst skömmu eftir miðnættið í nótt.

Lið Chicago hefur ekki náð að fylgja eftir óvæntum árangri sínum frá í fyrra, en er engu að síður með mjög skemmtilegt lið, sem spilar góðan liðsbolta. Allen Iverson er allt í öllu hjá Philadelphia og er einn stigahæsti leikmaður deildarinnar. Hann skoraði m.a. 42 stig, hirti 8 fráköst og gaf 9 stoðsendingar í nótt þegar Philadelphia lagði meistara San Antonio á heimavelli sínum.