Joe Cole tryggði Englendingum sigur

Joe Cole, leikmaður Chelsea, var maðurinn á bak við sigur Englendinga á Úrúgvæ í æfingaleik þjóðanna á Anfield í kvöld. Eftir að gestirnir höfðu komist yfir með sannkölluðu draumamarki í fyrri hálfleiknum, lagði Cole upp jöfnunarmarkið fyrir Peter Crouch og skoraði svo sigurmarkið sjálfur í uppbótartíma.

Leikurinn var ekki mikið fyrir augað og þá sérstaklega í síðari hálfleik, þar sem lið Úrúgvæ virtist lítinn áhuga hafa á öðru en að bíða eftir lokaflautinu og tafði leikinn með tíðum innáskiptingum. Það var þó Joe Cole sem gerði vonir þeirra um jafntefli að engu á lokaandartökum leiksins þegar hann skoraði af stuttu færi eftir góða sendingu frá Shaun Wright-Phillips.