Lemgo í undanúrslitin

Ásgeir Örn Hallgrímsson og Logi Geirsson skoruðu 4 mörk hvor þegar lið þeirra Lemgo komst í undanúrslit Evrópukeppni félagsliða í handbolta í dag. Lemgo lagði rússneska liðið Dynamo Astrakhan á útivelli 33-31 en þetta var síðari leikur liðanna. Samanlagður sigur Lemgo var stór en fyrri leikurinn vannst 33-18. Þrjú þýsk lið eru meðal þeirra fjögurra sem eru komin í undanúrslitin en í gær komust Gummersbach og Göppingen áfram.

Guðjón Valur Sigurðsson fór á kostum og skoraði 12 mörk fyrir Gummersbach í gær þegar liðið tryggði sig í undanúrslitin þrátt fyrir tap gegn spænska liðinu Bidasoa, 30-26. Róbert Gunnarsson lék einnig með Gummersbach og skoraði tvö mörk. Creteil tekur á móti Kielce síðar í dag og þá skýrist hvert fjórða liðið verður. Creteil telst þar óneitanlega sigurstranglegra eftir að hafa unnið fyrri leikinn með 14 marka mun, 35-21.