Klinsmann kallaður á teppið í þinginu

Jurgen Klinsmann, landsliðsþjálfari Þjóðverja í knattspyrnu gæti þurft að mæta inn á teppið í þýska þinginu á næstu dögum og ekki af góðu. Þingmenn þar í landi eru órólegir í kjölfar þess að þýska landsliðið var tekið í bakaríið af Ítölum í vináttulansleik í vikunni þar sem úrslitin urðu 4-1 fyrir smjörgreiddu súkkulaðistrákana.

Þegar kemur að knattspyrnu eru sérfræðingarnr æði margir sem spretta fram en fáir útvaldir og eru þingmenn þar engin undantekning. Kristilegir demókratar og jafnaðarmenn létu hafa eftir sér í þýska blaðinu Bild í gær að þeir vildu kalla landsliðsþjálfarann á sinn fund til að svara ýmsum spurningum sem brenna á vörum þingmanna.

Þeir vilja hafa ýmsa hluti á hreinu eins og. t.d. líkamlegt ástand leikmanna landsliðsins og hvaða leikmenn Klinsmann ætlar að stóla mest á. Eins og flestum ætti að vera kunnugt fer heimsmeistarakeppnin fram í Þýskalandi í sumar og er búist við miklu af liði heimamanna.

"Það væri ágætt ef herra Klinsmann kæmi fyrir íþróttanefndina og útskýrði hverjar hans áætlanir eru og hvernig Þýskaland getur unnið heimsmeistarakeppnina." sagði Norbert Barthle, einn þingmanna Angelu Merkel kanslara Þýskalands við dagblaðið Bild, og var ekkert að fara í felur með væntingarnar. Ekki hefur heyrst frá herra Klinsmanna enn svo vitað sé um þessi orð æðstu manna.