Skömmumst okkar fyrir árangurinn á útivöllum

Chris Coleman er afar óhress með árangur sinna manna á útivelli á leiktíðinni og þykir kominn tími til að hans menn sýni hvað í þeim býr á Anfield í kvöld þegar liðið mætir Liverpool í ensku úrvalsdeildinni. Fulham hefur tapað fimm af síðustu sjö leikjum sínum í deildinni.

"Síðustu tveir leikir hjá okkur hafa verið algjörlega óásættanlegir hjá okkur í ljósi þess sem við lögðum upp með í upphafi tímabils. Við fengum það sem við áttum skilið út úr síðustu tveimur leikjum - sem var nákvæmlega ekki neitt. Ég skammast mín fyrir árangur okkar á útivöllum og ég held að leikmennirnir geri það líka," sagði Coleman.

Rafa Benitez vill að leikmenn sýni skapgerð sína í leiknum í kvöld. "Það er á okkar ábyrgð að halda áfram að vinna leiki og ég hef sagt strákunum að nú verði þeir að sýna úr hverju þeir eru gerðir eftir það sem á undan er gengið. Þeir sýndu góða spretti í síðari hálfleiknum gegn Arsenal á dögunum og verða að sýna meira af því sama í kvöld. Það þýðir ekkert að standa bara og blaðra - ef menn ætla að sýna fram á að þeir séu á réttri leið, verða menn að sýna það í verki á vellinum með því að spila vel, skora mörk og vinna leiki," sagði Benitez, en hans menn hafa ekki átt góðu gengi að fagna undanfarið frekar en lið Fulham.