Það vann enginn fyrir kaupinu sínu

Stuart Pearce, stjóri Manchester City var æfareiður eftir tap sinna manna fyrir Middlesbrough í ensku úrvalsdeildinni í gær og sparaði ekki stóru orðin eftir leikinn þegar hann sagði leikinn verstu frammistöðu liðs undir sinni stjórn og sagði engann leikmanna sinna hafa unnið fyrir kaupinu sínu í leiknum.

"Þetta var skelfileg útreið," sagði Pearce um 1-0 tapið fyrir Boro. "Ég verð að biðja stuðningsmenn okkar afsökunar á þessum leik og ef mínir menn halda áfram að spila svona get ég alveg eins snúið mér að einhverju öðru. Stuðningsmenn okkar hafa fullan rétt til að láta í sér heyra, því þeir borga góða upphæð til að sjá okkur spila. Ég verð að sætta mig við það og nú er það undir mér og leikmönnunum komið að rétta úr kútnum og gera eitthvað í þessu. Svona lagað gengur alls ekki," sagði Pearce fokvondur eftir leikinn.