Fabregas á góðum batavegi

Arsene Wenger, stjóri Arsenal, er bjartsýnn á að miðjumaðurinn Cesc Fabregas verði klár í byrjunarlið í leiknum gegn Juventus í Meistaradeildinni annað kvöld en telur aðeins 30% líkur á því að varnarmaðurinn Emmanuel Eboue verði í byrjunarliðinu. Fabio Capello segist ekki gráta það að vanti menn í lið Juventus, en fagnar því sérstaklega að endurheimta Pavel Nedved úr leikbanni.

"Ég velti mér ekki upp úr því þó vanti menn í mitt lið, maður verður bara að spila úr því sem maður hefur. Ég neita því þó ekki að ég er mjög sáttur við að fá Pavel Nedved aftur inn í liðið, sérstaklega af því við þurfum að sækja í leiknum. Hann er maður sem getur breytt gangi leiksins og við þurfum mikið á leikni hans að halda gegn Arsenal," sagði Capello.