Bremen burstaði Bayern

Baráttan um Þýskalandsmeistaratitilinn í knattspyrnu opnaðist nokkuð í dag þegar Werder Bremen vann 3-0 sigur á meisturum Bayern Munchen á heimavelli sínum. Bastian Schweinsteiger skallaði boltann í eigið net eftir hálftíma leik og Daninn Daniel Jensen og Tim Borowski bættu við tveimur mörkum undir lokin til að fullkomna slæma viku fyrir Oliver Kahn, markverði Bayern.

Bayern er efst í deildinni með 66 stig, en þar á eftir koma Bremen og Hamburg með 59 stig, en síðarnefnda liðið á leik til góða. Bayern er þó enn í lykilstöðu með að vinna 20. meistaratitil sinn þegar aðeins fimm leikir eru eftir af deildarkeppninni, en Hamburg getur minnkað forskot þeirra í fjögur stig með sigri gegn Gladbach á morgun.