Ánægður með Fowler

Rafa Benitez var ánægður með sigurmark afmælisbarnsins Robbie Fowler gegn Bolton í ensku úrvalsdeildinni í dag og gaf til kynna að frammistaða eins og þessi yrði ekki til að skemma fyrir honum þegar kæmi að því að endurskoða samning hans í sumar.

"Það var gaman fyrir Robbie að skora á afmælisdaginn sinn og þetta þýðir að ég þarf brátt að fara að svara spurningum um samning hans. Það eina sem ég segi er að ef hann heldur áfram að skora og leika vel, mun það hjálpa okkur öllum í framhaldinu," sagði Benitez og Sam Allardyce, stjóri Bolton, tók í sama streng.

"Ef hann heldur áfram að skora svona mörk fyrir Liverpool, er nokkuð víst að þeir muni halda honum. Þetta var dæmigert mark fyrir hann. Hann hitti boltann ekki vel, en góður framherji eins og Fowler kemur boltanum alltaf á rammann og þó hann hafi ekki hitt boltann vel - fór hann samt i markið," sagði Allardyce, sem skiljanlega var ekki sáttur við tapið sem var það þriðja í röð hjá Bolton og gæti kostað liðið í baráttunni um sæti í Evrópukeppninni.