Wenger hrósaði Bergkamp

Arsene Wenger var mjög sáttur við frammistöðu sinna manna í sigrinum á West Brom í dag, en liðið náði að yfirvinna jöfnunarmark örvæntingarfullra gestanna seint í leiknum og vinna með tveggja marka mun. Hollendingurinn fljúgandi, Dennis Bergkamp, sýndi að hann er ekki dauður úr öllum æðum og skoraði glæsilegt mark sem innsiglaði sigur heimamanna rétt fyrir leikslok.

"Bergkamp tapar aldrei reisninni og sýndi í dag að hann kann þetta allt saman ennþá eftir tíu ár í bransanum. Það hefði verið súrt að gefa honum ekki tækifæri í leiknum og hann kom svo sannarlega með það sem við þurftum frá honum. Strákarnir voru frábærir eftir að þeir fengu á sig jöfnunarmarkið og ég er ánægður með hvað við nýttum færin okkar vel," sagði Wenger.

Bryan Robson kenndi reynsluleysi sinna manna um hvernig fór. "Við spiluðum mjög vel í síðari hálfleik og það hefði verið okkur mjög mikilvægt að ná í stig hér í dag. Eftir að við jöfnuðum hljóp svo spenna í mína menn og þeir hættu sér of framarlega á völlinn og var refsað fyrir það."