Jafntefli hjá Tottenham og Arsenal

Erkifjendurnir í Norður-Lundúnum gerðu 1-1 jafntefli í geysimikilvægum leik í ensku úrvalsdeildinni í dag. Robbie Keane, sem áður hafði sagt leikinn þann mikilvægasta á sínum ferli, kom Tottenham yfir á 66. mínútu en Frakkinn Thierry Henry jafnaði fyrir Arsenal á þeirri 84.

Jafnteflið þýðir að Arsenalmenn verða að treysta á að Tottenham tapi stigum í síðustu tveimur leikjum sínum en Arsenal situr í fimmta sæti eigandi þrjá leiki eftir á meðan Tottenham eru í því fjórða, með fjórum stigum meira, eigandi tvo leiki eftir. Fjórða sætið gefur rétt á keppni í forkeppni Meistaradeildar Evrópu en Arsenal mæta einmitt Villareal í síðari leik undanúrslita þeirrar keppni á miðvikudaginn.

Hollendingurinn Edgar Davids var rekinn útaf undir lok leiksins og verður því að líkindum í leikbanni það sem eftir lifir tímabils.