Ég er í verstu stjórastöðu í heiminum

Það vakti nokkra athygli eftir leik Chelsea og Manchester United í dag þegar Jose Mourinho, stjóri Chelsea, tók af sér verðlaunapeninginn og fleygði honum upp til áhorfenda. Þegar honum var svo réttur annar peningur, fékk hann að fara sömu leið. Mourino sagði eftir leikinn að Chelsea væri versta félag að þjálfa í heiminum.

"Ég á svona verðlaunapening frá í fyrra og því skildi ég vilja safna þessu endalaust?" sagði hann þegar hann var spurður út í þetta furðulega atvik. "Þar fyrir utan vil ég heldur að einhver af áhorfendunum í þessari stúku fái að eiga ógleymanlega minningu frá leiknum - nú eða verði ríkur af því að selja peninginn bara á Ebay," sagði Mourinho, en var í framhaldinu spurður hvort þessi litla athöfn hans hefði verið táknræn eins og þegar hann tók strax af sér verðlaunapeninginn eftir sigurinn í meistaradeildinni með Porto um árið.

"Ekki nema ég verði rekinn," sagði Mourinho, sem síðar lýsti því yfir að Chelsea væri versta félag í heiminum til að stýra - því hvorki hann né félagið fengi þá virðingu sem það ætti skilið fyrir frábæran árangur sinn. "Ég ætti að vera hamingjusamasti knattspyrnustjóri í heimi, en ég er það alls ekki. Það þýðir samt ekki að ég sé á förum og ég ætla að halda áfram," sagði Mourinho.