New Jersey mætir Detroit

New Jersey Nets er komið í aðra umferð úrslitakeppninnar í Austurdeildinni eftir 96-90 baráttusigur á meiðslum hrjáðu liði Indiana Pacers í sjötta leik liðanna í nótt og vann því einvígið 4-2. New Jersey mætir Miami í næstu umferð.

Richard Jefferson átti mjög góðan leik hjá New Jersey og skoraði 30 stig, Vince Carter skoraði 24 stig og Jason Kidd skoraði 8 stig, hirti 12 fráköst og átti 11 stoðsendingar. Fyrrum leikmaður New Jersey, varaleikstjórnandinn Anthony Johnson, átti sinn besta leik á ferlinum hjá Indiana og skoraði 40 stig. Það dugði þó ekki til fyrir Indiana, sem var án þriggja byrjunarliðsmanna lengst af í einvíginu.

"Ég ber mikla virðingu fyrir liði Indiana. Ekkert lið í deildinni hefur orðið fyrir jafn miklu mótlæti á síðustu tveimur árum, en við vissum vel að við ættum gríðarlega erfitt verkefni fyrir höndum þegar ljóst var að við ættum að mæta Indiana í fyrstu umferðinni," sagði Lawrence Frank, þjálfari New Jersey.