Duncan Ferguson á förum

Úrvalsdeildarlið Everton hefur ákveðið að endurnýja ekki samninga við framherjann skapheita Duncan Ferguson og sömu sögu er að segja af kínverska landsliðsmanninum Li-Tie. Þá ætlar félagið ekki að kaupa varnarmanninn Matteo Ferrari sem verið hefur á lánssamningi frá Roma. Everton hefur hinsvegar boðið þeim Alan Stubbs og David Weir áframhaldandi samninga.

Hinn skoski Duncan Ferguson spilaði því sinn síðasta leik fyrir Everton um helgina, þegar hann skoraði jöfnunarmark liðsins gegn West Brom. Ferguson hefur átt það til að komast í kast við lögin innan sem utan vallar á ferlinum, en hefur þó alla tíð verið í miklu uppáhaldi hjá stuðningsmönnum liðsins.