McClaren kennir dómurunum um tapið

Steve McClaren, stjóri Middlesbrough, kennir dómurum leiksins um tapið stóra fyrir Sevilla í úrslitum Evrópukeppni félagsliða í kvöld. Hann segist stoltur af frammistöðu leikmanna sinna, en taldi þá ekki eiga möguleika í leiknum því allt hafi gengið þeim í óhag hvað varðar dómgæsluna.

"Ég er stoltur af leikmönnum mínum og ætla ekki að gagnrýna þá, því við töpuðum þessum á atriðum sem unnu gegn okkur. Sevilla er gott lið og olli okkur vandræðum, en við gátum ekki spilað jafn afslappaðir og í leikjunum fram að þessu í keppninni," sagði McClaren sem vildi meina að sínir menn hefðu verið rændir vítaspyrnu í leiknum.