Alonso tæpur hjá Liverpool

Leikur ársins á Englandi fer fram á morgun, sjálfur úrslitaleikurinn í enska bikarnum milli Liverpool og West Ham. Leikurinn verður sýndur beint á Sýn og hefst útsending klukkan 13. Miðjumaðurinn Xabi Alonso hjá Liverpool er tæpur vegna ökklameiðsla og hjá West Ham hafa þeir Dean Ashton og Matthew Etherington ekki geta æft í dag vegna meiðsla en hafa þó ekki verið afskrifaðir fyrir morgundaginn.

Þeir Hayden Mullins og Luis Garcia eru í leikbanni og missa af leiknum. Liverpool er á höttunum eftir sínum sjöunda sigri í keppninni, en West Ham hefur þrívegis lyft enska bikarnum. Leikurinn á morgun er 125. úrslitaleikurinn í þessari elstu knattspyrnubikarkeppni veraldar.