Crespo fer frá Chelsea

Jose Mourinho hefur gefið það út að hann sé á höttunum eftir nýjum framherja, því hann ætli að leyfa Argentínumanninum Hernan Crespo að yfirgefa herbúðir liðsins í sumar. "Hernan er frábær leikmaður, en hefur ekki farið leynt með ósk sína að snúa aftur til Ítalíu og ég hef ákveðið að leyfa honum það," sagði Mourinho.

Þetta þykir renna stoðum undir það að Chelsea muni kaupa annað hvort Andriy Shevchenko frá Milan eða Samuel Eto´o hjá Barcelona. "Það er eðlilegt að nöfn svona manna dúkki upp þegar við erum að leita okkur að framherja - en þetta kemur allt í ljós fljótlega," sagði Mourinho.