Malbranque settur á sölulista

Franski miðjumaðurinn Steed Malbranque hefur verið settur á sölulista hjá enska úrvaldeildarliðinu Fulham eftir að hann hafnaði tilboði félagsins um nýjan samning. Forráðamenn Fulham segjast hafa boðið hinum hæfileikaríka Frakka besta samning í sögu félagsins, en hafa afráðið að skella honum á sölulista eftir að hann hafnaði tilboðinu.

Malbranque hefur verið hjá Lundúnaliðinu síðan árið 2001 þegar hann kom til Englands frá Lyon í Frakklandi og hefur verið einn af bestu leikmönnum deildarinnar æ síðan. Hann hefur til að mynda skorað yfir 40 mörk í rúmlega 200 leikjum í úrvalsdeildinni. Það er því ljóst að þessi tíðindi munu áreiðanlega vekja áhuga fjölda liða í deildinni.