Seinna markið var algjör heppni hjá mér

Steven Gerrard hefur viðurkennt að draumamark hans í úrslitaleik enska bikarsins gegn West Ham um helgina hafi verið byggt á mikilli heppni, því hann hafi ekki miðað knettinum þangað sem hann á endanum söng í netmöskvunum. Hvað sem því líður er nokkuð víst að enginn á eftir að gleyma þessum sögulega þrumufleyg fyrirliðans.

"Ég var gjörsamlega búinn á því á þessum tímapunkti í leiknum og skömmu áður hafði ég tekið aukaspyrnu sem nánast flaug út fyrir leikvanginn. Ég verð að viðurkenna að ég miðaði nú ekki í þetta horn þegar ég tók spyrnuna, en ég vissi að boltinn færi á markið því ég hitti hann svo vel. Ég hitti boltann vel eftir góða sendingu í fyrra markinu, en það síðara var heppni hjá mér," sagði Gerrard og bætti við að framlengingin hefði verið leikmönnum Liverpool mikil þolraun.

"Við biðum hreinlega eftir því að flautað yrði af, því það var engu líkara en við værum að spila fimm þarna inni á vellinum og menn hrundu í grasið með krampa hver af öðrum. Við lærðum það hinsvegar eftir úrslitaleikinn í meistaradeildinni í fyrra að þó maður lendi undir, er leikurinn ekki búinn fyrr en flautað hefur verið af og sú reynsla kom sér sannarlega vel þarna.

Þegar svo Reina varði glæsilega frá West Ham í framlengingunni, fannst okkur sem við ættum möguleika á að sigra. Við gerum mikið af því að æfa vítakeppnir á æfingum og þar hef ég kynnst því hvað er erfitt að skora hjá Reina. Við höfðum fulla trú á honum í vítakeppninni og hann stóð fyllilega undir því," sagði Gerrard, sem fór þess á leit við Benitez að fá að taka fyrstu spyrnuna í vítakeppninni. Honum var hinsvegar skipað að taka þriðju spyrnuna og náði hann að skora úr henni.

"Ég reyndi bara að spyrna eins fast og ég gat og hitta á rammann."