Huth orðinn leiður á að sitja á bekknum

Þýski landsliðsmaðurinn Robert Huth segist vera orðinn hundleiður á að sitja endalaust á varamannabekknum hjá Englandsmeisturum Chelsea og ekki er ólíklegt að hann verði lánaður eða seldur frá félaginu á næstu leiktíð.

Huth, sem er 21 árs gamall, hefur verið aftastur í goggunarröðinni hjá Jose Mourinho hingað til og er orðinn afar þreyttur á setunni á varamannabekknum. "Það eina sem er á hreinu varðandi framtíð mína er að ég er ekki sáttur. Það slítur manni mikið út að æfa vel en fá aldrei tækifæri og það kemur að því að maður fær bara nóg af því," sagði Huth, sem spilaði aðeins 13 leiki með Chelsea á síðustu leiktíð.