Schumacher langt frá því að gefast upp

Þýski ökuþórinn Michael Schumacher hjá Ferrari er langt frá því að ætla að leggja árar í bát þó hann hafi orðið fyrir mótlæti í Mónakókappakstrinum um síðustu helgi og ætlar að byggja á góðum akstri sínum, sem skilaði honum í fimmta sæti þó hann hefði þurft að ræsa síðastur í upphafi keppni.

"Ég er ennþá í öðru sæti í keppni ökumanna og þó forskot Alonso sé vissulega gott, er ég ekkert að fara að gefast upp. Þeir sem þekkja mig vita að ég er ekki þannig. Ég gefst aldrei upp," sagði Schumacher.