Ólíklegt að Rooney spili gegn Trinidad

Nú þykir frekar ólíklegt að Wayne Rooney snúi aftur í enska landsliðshópinn fyrir leikinn gegn Trinidad á fimmtudaginn eins og talað hefur verið um í gær og í morgun. Forráðamönnum enska liðsins þykir ekki heppilegt að taka þá áhættu í leik gegn liði sem Englendingar ættu vel að geta unnið án hans. Læknum Manchester United hefur verið lofað að fá að skoða Rooney áður en hann spilar sinn fyrsta leik fyrir landsliðið.

Í morgun bárust fréttir af því að Rooney yrði jafnvel í enska liðinu á fimmtudaginn, en það hefur nú verið dregið til baka og líklega er hægt að fullyrða að hann verði ekki með úr því breskir veðbankar eru hættir að taka við veðmálum þess efnis.

Næsti leikur enska liðsins er svo gegn Svíum þann 20. júní og þá er líklegra að Rooney yrði gefið tækifæri til að koma sér í leikform.