Vildi taka við enska landsliðinu

Luiz Felipe Scolari, þjálfari portúgalska landsliðsins, hefur gefið það út að hann hafi haft mikinn áhuga á að taka við enska landsliðinu á sínum tíma, en það hafi í raun verið smáatriði sem gerðu honum ókleift að þiggja starfið.

Enskir fjölmiðlar voru búnir að slá því föstu fyrir nokkrum vikum að Scolari yrði næsti landsliðsþjálfari Englendinga, en ekkert varð af því og Scolari gaf helst þá skýringu að sér hefði ofboðið ágangur fjölmiðla. Hann hefur nú gefið fulla skýringu á ákvörðun sinni að hætta við að taka við starfinu.

"Það voru öðru fremur tvö atriði sem komu í veg fyrir að ég tæki við starfinu. Í fyrsta lagi vildu Englendingar kynna nýja þjálfarann áður en HM hæfist og við því gat ég ekki orðið. Þá vildi ég líka fá að ráða því hvaða menn yrðu mér til aðstoðar og okkur gekk illa að komast að málamiðlun í þeim efnum. Viðræðurnar gengu vel, en ég var skuldbundinn Portúgal og gat því ekki uppfyllt skilyrði enska knattspyrnusambandsins," sagði Scolari.

"Það er auðvitað draumur allra þjálfara að taka við enska landsliðinu, en ég var því miður ekki í aðstöðu til að fá tækifæri til þess nú. Það má vel vera að evrópskur þjálfari hefði geta það, en ég er frá Brasilíu og ég hefði ekki geta fengið mig til að stappa stálinu í mína menn á HM ef við hefðum svo kannski mætt Englendingum í keppninni," sagði Scolari, sem útilokar alls ekki að taka við enska liðinu í framtíðinni.