Varamennirnir nýttu tækifæri sitt vel

Spænski varnarmaðurinn Juanito var ánægður með frammistöðu félaga sinna í sigrinum á Sádum í lokaleiknum í riðlakeppninni í dag. Hann segir að þeir varamenn sem fengu tækifæri í leiknum hafi nýtt það vel og staðið fyllilega undir væntingum.

"Það var auðvitað lítil pressa á okkur af því við vorum komnir áfram fyrir leikinn, en mér þykir þeir leikmenn sem fengu tækifæri í dag nýta það vel. Það er alltaf gott fyrir þjálfarann að geta leyft mönnum að spreyta sig sem annars fengju kannski ekki tækifæri á svona stórmóti," sagði Juanito, sem var mjög ánægður með að ná að skora mark í leiknum.