Argentína áfram

Argentínumenn eru komnir í 8-liða úrslit HM eftir 2-1 sigur á Mexíkóum í kvöld. Rafael Marquez kom Mexíkó yfir strax í byrjun leiks, en Argentínumenn jöfnuðu á 9. mínútu með sjálfsmarki. Staðan var jöfn að loknum venjulegum leiktíma, en aðeins þrumufleygur Maxi Rodriguez í upphafi framlengingar skildi liðin að þegar upp var staðið.

Argentínska liðið var fjarri því jafn sannfærandi í kvöld og það var í leikjum sínum í riðlakeppninni og eiga Mexíkóar heiður skilinn fyrir góðan leik. Það sem skildi liðin að í kvöld var einfaldlega sú staðreynd að argentínska liðið hefur á að skipa mönnum sem geta klárað leiki með einstaklingsframtaki, eins og Rodriguez gerði í kvöld.

Það er því ljóst að Argentínumenn og Þjóðverjar mætast í 8-liða úrslitum keppninnar og þar verður enginn smá leikur á ferðinni. Fá lið eiga sér viðlíka stríðssögu á knattspyrnuvellinum og þessi tvö, en þau léku til að mynda til úrslita á HM tvær keppnir í röð á sínum tíma - 1986 og 1990, þar sem hvort lið vann einu sinni.