Portúgalar áfram í ljótum leik

Það verða Portúgalar sem mæta Englendingum í 8-liða úrslitunum á HM eftir að liðið lagði Hollendinga 1-0 í dag. Það var Maniche sem skoraði sigurmarkið í fyrri hálfleik, en leikurinn leystist upp í algjöra vitleysu í þeim síðari og alls voru fjórir leikmenn reknir af velli með rautt spjald.

Hollendingar reyndu hvað þeir gátu að sækja til sigurs í síðari hálfleik, þar sem þeir voru lengst af 10 gegn 9 Portúgölum. Þeir Costinha og Deco voru reknir af velli hjá Portúgal og Khalid Boulahrouz og Giovanni van Bronchorst fóru sömu leið hjá hollenska liðinu. Það vakti athygli að Ruud Van Nistelrooy fékk ekki að koma inn í hollenska liðið og fékk Jan Vennegoor of Hesselink þess í stað tækifæri í hans stað.

Portúgalar mæta Englendingum í næstu umferð og þar verður liðið án þeirra Costinha og Deco - og óvíst er með þáttöku Cristiano Ronaldo í þeim leik eftir að hann meiddist í dag.