Vítaspyrnudómurinn var loðinn

Guus Hiddink var að vonum vonsvikinn eftir að hans menn Ástralar féllu úr keppni á HM eftir 1-0 tap fyrir Ítölum. Hiddink þótti vítaspyrnudómurinn í blálokinn nokkuð loðinn, en viðurkenndi að hans menn gætu sjálfum sér um kennt að hafa ekki náð að skora fyrr, þar sem þeir voru manni fleiri hálfan leikinn.

"Það er endalaust hægt að rífast um þennan vítaspyrnudóm, sem var frekar vafasamur að mínu mati. En þegar öllu er á botninn hvolft, er það kannski sjálfum okkur að kenna að við duttum út í dag, því við vorum ekki nógu vægðarlausir fyrir framan mark þeirra. Ég er samt stoltur af liði mínu, ekki aðeins hvernig þeir spiluðu í dag - heldur á öllu mótinu," sagði sá hollenski.