Lokatölurnar misvísandi

Carlos Parreira, þjálfari Brasilíumanna, sagði að lokatölurnar í 3-0 sigri liðsins á Gana í dag gefi ranga mynd af  leiknum, því hans menn hafi mætt gríðarlega harðri mótspyrnu frá Afríkumönnunum og verið heppnir að fá ekki á sig mark.

"Maður sem sá ekki leikinn og skoðar lokatölurnar áætlar eflaust að þetta hafi verið auðveldur sigur hjá okkur, en það er fjarri sannleikanum. Við vorum mjög heppnir að ná að halda hreinu í fyrri hálfleik og Ganamennirnir voru geysilega erfiðir viðureignar. Þeir eru með sterkt og vel spilandi lið, en við náðum sem betur fer að klára færin okkar og erum komnir áfram, " sagði Parreira, sem vildi lítið tjá sig um framhaldið í keppninni.