Ævintýrið heldur áfram

Gamla brýnið Zinedine Zidane sýndi að hann er ekki dauður úr öllum æðum í kvöld þegar hann skoraði þriðja og síðasta mark Frakka í sigrinum á Spánverjum. Ef Frakkar hefðu tapað leiknum hefði það orðið síðasti leikur Zidane á ferlinum, en sá gamli var greinilega ekki tilbúinn að leggja skóna á hilluna.

"Þetta var frábært í kvöld. Spánverjarnir gerðu okkur gríðarlega erfitt fyrir, en ævintýrinu er enn ekki lokið. Við viljum ná eins langt og við mögulega getum og gefa þeim sem hafa gagnrýnt okkur langt nef," sagði Zidane.

Raymond Domenech, þjálfari Frakka, var í skýjunum eftir leikinn. "Þetta var frábær leikur í alla staði, en mjög erfiður. Við erum kannski roskið lið, en við sýndum að við höfum mikla og góða þolinmæði. Ungir leikmenn eiga það til að sprengja sig, en við höfðum þolinmæði. Ég held að eitthvað stórkostlegt bíði okkar í þessari keppni. Sjáið bara Zidane, hann var enn á fullum krafti á 89. mínútu leiksins," sagði Domenech ánægður og fer nú að undirbúa lið sitt undir erfiðasta verkefnið til þessa - að mæta sjálfum heimsmeisturunum í næstu umferð.